កាលពីយប់ថ្ងៃទី៣ ខែឧសភា បុគ្គលិកសុខាភិបាលផ្នែកដឹកអ្នកជំងឺកូវីដ-១៩ បានថតវីដេអូផ្សាយផ្ទាល់ តាមបណ្ដាញសង្គមហ្វេសប៊ុក ឃើញអ្នកជំងឺ ២០ នាក់ ដែលមិនបានចូលសម្រាកព្យាបាល និងត្រូវនាំគ្នាសម្រាន្តហាលសន្សើម នៅលើស្មៅ ក្នុងបរិវេណស្ដាត ពេញមួយយប់ និងអត់បាយក្រហាយទឹក ព្រោះគ្មានអ្នកយកចិត្តទុកដាក់ពួកគាត់។ បុគ្គលិកពេទ្យរូបនោះ ថាខ្លួនជាមន្រ្តីតូចតាច ស្មើនឹងអំបាតរបស់គេទេ គ្មានអ្វីអាចជួយអ្នកជំងឺបានក្រៅពីជួយផ្សាយផ្ទាល់បែបនេះ ដើម្បីឲ្យអ្នកថ្នាក់លើឃើញ និងដឹងតែប៉ុណ្ណោះ៖ «ពួកគាត់ពីភូមិដំណាក់ធំបី ២០ នាក់យប់មិញ អត់ទាន់មានកន្លែងសម្រាកទេ។ សម្រាកនៅលើសួន ព្រោះពួកគាត់ឃើញឡានពួកយើងចូលមក គាត់ស្ទុះមកកន្លែងសួន មកទាំងអស់គ្នាដែរ។ ផ្សាយផ្ទាល់ (live) បែបនេះទៅឲ្យខាងលើគាត់មើលឃើញ គាត់ដឹងថា ពួកគាត់មកដល់នេះយ៉ាងម៉េច។ បើបែបនេះឲ្យពួកគាត់សម្រាកនៅផ្ទះទៅល្អជាង។ បើនៅផ្ទះទោះបីពួកគាត់អត់មានអ្វីហូប ក៏ពួកគាត់មានជម្រកត្រឹមត្រូវនោះដែរ។ ដល់ពេលលើកក្រោយហៅអ្នកជំងឺមក អ្នកជំងឺអ្នកមកព្យាបាលតាំងខឹងអ្នកជំងឺទៀតហើយ!»ជាមួយគ្នានេះ អ្នកជំងឺថ្មីៗបន្ថែមជិត ១០ ឡានទៀត ក៏គេមិនអនុញ្ញាតឲ្យចូលក្នុងកន្លែងព្យាបាលភ្លាមៗដែរ។ អ្នកជំងឺថ្មីទាំងនោះ មានទាំងមនុស្សចាស់ កូនក្មេង ស្ត្រីមានផ្ទៃពោះផង។ ពួកគាត់ត្រូវអង្គុយក្នុងឡាន រង់ចាំច្រើនម៉ោង ទើបមានការអនុញ្ញាតឲ្យចូលទៅខាងក្នុងទីតាំងព្យាបាល។
លោក លើកទឹកចិត្តឲ្យរដ្ឋាភិបាលដកមន្ត្រីអសមត្ថភាពទាំងនោះចេញនិងត្រូវយកអ្នកមានសមត្ថភាពគ្រប់វិស័យមកចូលរួមជួយ ទើបអាចទប់ស្កាត់ការឆ្លងជំងឺកូវីដ១៩បាន៖ «ខ្លះអត់ទឹកហូបហ្នឹង ក្នុងឡានហ្នឹង។ រ៉ៃអង្គាសលុយគ្នាទិញទឹក។ អ៊ីចឹងទេ យើងគួរណារៀបចំអាហ្នឹង ហើយអាណិតអ្នកជួរមុខហ្នឹង។ ខ្ញុំសូមសំណូមពរដដែលសូមឲ្យរកអ្នកជំនាញៗ ពូកែខាងអ្វី ឲ្យមកជួយ។ ពូកែខាងព័ត៌មាន ឲ្យមកជួយខាងព័ត៌មាន។ ពូកែខាងIT ជួយIT។ ពូកែខាងប្រមូលផ្ដុំអ្នកជំងឺឲ្យមកប្រមូលផ្ដុំអ្នកជំងឺ។ ពូកែខាងធ្វើតេស្តឲ្យមកធ្វើតេស្តRapid test។ បើមិនអ៊ីចឹងទេ ខ្ញុំមើលទៅច្របូកច្របល់វ៉ល់វ៉ក់នៅហ្នឹង ហើយមិនដឹងថា ប្រមុខរដ្ឋាភិបាល លោកបានឃើញ ឬក៏ក្រសួងបានឃើញទេ។ អាហ្នឹងខ្ញុំវាយតម្លៃទៅ ដូចថា ជារឿងបុគ្គលទាំងអស់»។ (Source: camnews.org)
No comments:
Post a Comment